CCCLIV.

1462, Februar 2. (Frankenstein.)

Nicolasch Zypser von Kamenz, königlicher Hauptmann zu Frankenstein, bestätigt, dass Georg von Brockutt dem Stifte die Scholtisei zu Paulwitz verkauft.

Ich Nicolasch Zypser von Camencz, von koniglicher mechte zcu Bhemen houptman zu Franckensteyn, bekenne offintlichen mit desem briffe allen, die en sehen, horen unde lezen, das vor mir gestanden hat der woltuchtige Jorge von dem Brogkot, wolgesunt leybes unde synne, unde hat mit wissen unde willen seynes vettern, er Segemundis von Reichenbach unde mit guttem rothe seyner frunt, recht unde redlich vorkaufft unde in meyne hende williglichen uffgelossen dem erwirdigen herren unde herren Niclos apt czu Camentcz unde der ganczen sampmelungen erblichen den scholtczen zu Pawlwitcz in dem weicbilde Frankensteyn, mit aller hirschafft unde gerechteckeit in aller mosse, alz her den gehat hat, nemlich mit dreyen firdungen czinsen unde viher huner, die der scholcz czw Pawlwitcz, der ytczunt do yst unde alle nochkomende scholtczen unde besitczer des selbigen gerichtes alle ior ierlich ane allen uffczog geben unde beczalen sollen vor alle andir schulde unde gulde alzo rechte erbczinse, nemlich achtczen groschen uff Walpurgis neste komende unde achtczen groschen uff Michaelis neste dor noch folgende. Solche hirschafft unde czinse mit czugehorungen unde genissen der obgemelte herre Niclos apt von Camentcz gantcz unde gar wolczudancke gnuglich beczalt unde vorgolden hat; das der obgenante Jorge Brogkot selbis vor mir bekant hat. Ouch ap yrkeyn briff hinderstellig bleben were, der obir solche obgemelte hirschafft unde czinse uff daz benante gerichte sprechen worde, der sol vorbas crafftlos seyn unde dem obgenanten herren Niclos apte unde der sampmelunge czu Camencz, noch dem selbigen closter keynen schaden brengen, nw unde czu ewigen czeyten. Czu solchem erbkawffe, vorreichunge und ufflossunge habe ich von koniglicher gewalt meynen willen unde gunst gegebin durch ir allir bethe unde habe dem mebenanten herren Niclos apt czu Camentcz unde der ganczen sampmelungen und allen eren nochkomlingen solche obgeschrebene hirschafft mit dem scholsczen czu Pawlwitcz unde drey firdunge ieriger ewiger czinse, dorczu viber huner, alle iorliche czeit mit allen solchen rechten, notczen, genissen, erunge, fruchtbarkeiten, hirschafften unde czugehorungen in allir mosse unde meynunge, alz der obgenante Jorge Brogkot do gehat, genossen unde besessen hat, gelegen unde gelangit, leyhe unde lange in crafft desis briffes, gemachzam unde ungehindert erblich unde ewiglich czu haben, genissen und besitczen, methe thuen unde lossen, zu vorkewffen, vorsetczen, vorwichsiln, vorgeben, an eren besten notcz und fromen ewiglich zu wenden; sunderlich unsers herren des konigis dinste rechten unde hirschafften unschedlich. Czu urkunde desis briffes vorsigilt mit koniglichem anhangenden ingesegil, das do gehort obir erbe unde sachen in dem weichbilde Franckensteyn. Gegebin noch Cristi gebort tausent ior virhundirt dornoch in dem czwe unde sechczigisten iore in dem tage Unser Liben Frawen Lichteweyhe. Des synt geczewg unsers gnedigen herren des koniges man, die woltuchtigen: Hannus Reybenitcz von Cawbitcz, Heyntcz Domantcz von Schrepisdorff, Hannus Lodwig von Tarnaw unde Balthazar von Fredelant, dem dese sachen befolen worden.

Or. Perg. An grünseidnen Fäden das hauptmannschaftliche (Amts-) Siegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.